Inyiak,

Hari ko Ega basuo jo apak-apak. Alah gaek, alah lambek jalannyo. Mambaok tungkek yang bisa dipakai lo jadi tampek duduak. Mancaliak wajah Apak tu dari jauah, raso familiar wajahnyo. Raso ndak asiang. Cilalek jo aia muko Apak tu mambuek Ega takana jo Inyiak.

Kironyo, pas lah ega sapo, patuiklah. Baliau urang awak, Nyiak. Samo-samo barasa dari Bukiktinggi.

Apak tu alumni ITB, jurusan Arsitektur angkatan 1957. Dari carito Apak tu, nan Ega tangkok, setelah lulus Baliau manatap di Bandung.

Nyiak,

Mancaliak Apak tu payah maakai ka naiak janjang, Ega pun batanyo, ba kok Baliau nio jalan-jalan di kampus siang tu. Mancaliak Apak tu lah lambek bajalan, Ega makin heran ba kok amuah bana hati Baliau.

Ndeh Nyiak, gigiahnyo maingekan Ega tantang Inyiak. Kicek Baliau, Baliau latiah di rumah se, harus barani jalan kalua. Nan Ega tangkok, supayo talatiah juo badan Apak tu bia capek sehat (nampak dek Ega, Apak tu sudah kanai stroke).

Pas basuo juo Baliau tu, Baliau sadang mancari kafe, tampek makan. Dipikia-pikia, ba kok pai ka Kafe Apak tu yo. Rasonyo ndak jam makan lo lai waktu tu (lah jam satangah ampek siang). Kironyo, dibungkuih lo senyo di Apak tu, Nyiak.. Ndak makan di sinan Baliau do.

Tapikia dek Ega, urang awak ko kan yo sanang mambaok paragiahan jikok bajalan kalua, yo ndak Nyiak? Ado juo nan dibaok ka rumah jikok sudah bajalan-jalan.

Ega batanyo, “Lai juo pulang kampuang Pak?”

Kicek Apak tu, “Yo nio ka pulang sabulan duo bulan ko.”

Mudah-mudahan lai rajaki Baliau, Nyiak, untuak pulang kampuang sasuai rancana tu.

Ega sempat lo batanyo, “Surang si Apak ka mari?”

Tu kicek Baliau, “Iyo. Anak surang di Surabaya, duo di Jakarta, surang di Padang.”

Ndeh, luluah hati ega Nyiak mandanganyo.. Mudah-mudahan Baliau selalu dalam naungan Allah walau surang sin dalam kasaharian.

Mega

Muslim - Indonesian - Loves written words

Leave a Reply

Your email address will not be published. Required fields are marked *